NAIZ

«Prekarietateak hiltzen gaituela» salatzeko ekintza egin du Ernaik Bizkaiko patronalaren egoitzan

Cebek, Bizkaiko patronalak, Bilbon duen egoitzako ateak itxi dituzte Ernaiko kideek sinbolikoki eta pintura horia bota dute burutik behera egin duten salaketa ekintzan. «Prekarietateak hiltzen gaituelako ateak itxi dizkiogu Bilbon patronalari», azaldu dute sare sozialetan zabaldutako mezuan.

Cebek, Bizkaiko patronalaren egoitzaren atarian egin du salaketa ekintza Ernaik. (@ernaigazte)
Cebek, Bizkaiko patronalaren egoitzaren atarian egin du salaketa ekintza Ernaik. (@ernaigazte)

Ernai gazte erakundeko kdeek salaketa ekintza sinbolikoa egin dute gaur goizean Cebek, Bizkaiko patronalak, Bilbon duen egoitzaren atarian. Sarrerako atea itxi ondoren, pintura horia bota dute eta «prekarietatea hiltzailea» zioen margoketa egin dute, otsailaren 16ean Bilbon egingo dute manifestazioarako deia zabaltzearekin batera.

Topatu atari digitalean zabaldutako informazioaren arabera, Euskal Herrian Bizi dinamikaren barruan egindako ekintza izan da ostegun goizean egindakoa. Izan ere, Ernaiko kideek azaldu dutenez, iaz 68 pertsona hil zituen prekarietateak eta 2019an bi pertsona hil dira jada. Ildo horretan, gogoan izan dute asteazkenean Nafarroan hildako langile gaztea, Rotten XIII musika taldeko baxujolea zena.

Euskal Herrian Bizi dinamika aurkezterakoan esan zuten bezala, «gazteon bizitzak prekarietatez ezaugarritu dizkigute. Bizi baino biziraun beharrak. Izan ere, enpleguari lotutako baldintza kaxkarrez harago, ziurgabetasuna, heldulekurik eza, ezegonkortasuna eta segurtasun falta nagusitu dira gure bizitzako eremu guztietan».

Cebek, Bizkaiko patronalaren kontrako salaketa ekintzaz gain, otsailaren 16an Bilbon manifestazio nazionala egingo dutela prekarietatea salatzeko gogoratu dute.