Bilbainadak, aurten ere protagonista Aste Nagusiko eguerdietan

Bilboko Aste Nagusira gerturatzen den orok bilbainadak entzuteko aukera izango du, egunero, hiriko Casilda Iturrizar parkean. Abuztuaren 18tik 25era bitartean hainbat taldek animatuko die goiza parkera gerturatzen direnei. Udaletik adierazi dutenez, lau taldek joko dute, txandaka.

NAIZ|06/08/2019 16:31

Astiro-astiro, ezagutzera ematen ari dira hemendik bi aste baino gutxiagora iritsiko den Aste Nagusiaren egitarauaren zehaztapen guztiak. Casilda Iturrizar parkean bilbainadak jaun eta jabe izango dira, eguerdi partean. Abuztuaren 18tik 25era bitartean hainbat taldek animatuko die goiza parkera gerturatzen direnei. Udaletik adierazi dutenez, lau taldek joko dute, txandaka, jaiak irauten duten bitartean.

Lehenengo taldea Los Chimberos izenekoa da, abuztuaren 18an, igandea. Gero, Los 5 Bilbainos hilaren 19an, astelehenean, eta Los Txikis hilaren 20an, asteartean. Abuztuaren 21ean, asteazkenean, Los Chimberos arituko dira berriro, eta hilaren 22an, ostegunean, Gau Pasa. Horiek azken egunean ere arituko dira, abuztuaren 25ean, igandean. Los 5 Bilbainos eta Los Txikis taldeen bigarren emanaldia abuztuaren 23an, ostiralean, eta abuztuaren 24an, larunbatean izango dira, hurrenez hurren.

«Ez dira izango soilik bilbainadak Casilda Iturrizar parkean entzun ahalko diren doinuak. Habanerak, pasodobleak, hainbat eskualde eta naziotako folklorea eta, nola ez, euskal musikaz gozatzeko aukera egongo da Aste Nagusian. Errepertorio zabal honi esker, hurreratzen diren pertsonek goiz pasa atsegin bat pasako dute», adierazi dute Bilboko Udaletik.